الله معك...


إدّعى أحد الفلاسفِة الكُفّار إنّو الناس بيِعتِقدو بوجود الله لأنّو أهلُن عَلَّموهُن هالإعـتقاد لمّا كانو أطفال.

وأراد إنّو يِثبُت رأيو بالتَجرِبِة والإختِبار.

أخد طُفُل رَضيع وعَزَلو عن النّاس ورَبّاه بلا ما يُلفُظ قِدّامو إسم الله.

ولَمّا كِبِر الطُّفُل وصار صَبي ونَمَا عَقلو وصار يفَكِّر، ما عِرِف الفَيلَسوف شو بَدّو يقِلّو، لَمّا شافو راكِع عَ الأرض عَم يِتطَلَّع عَ الشمس المِشرقَة ويقول :

«ما أجمَلِك وما أجمَل يَللي خَلَقِك! إذا شِفتيه سَلميلي علَيه بَوسيه عَنّي».




الزوّادة بتقلّي وبتقلَّك :

الله هوّي يَللي خَلَقَك لو مَهما غَمَّضولَك عيونَك ومَنَعوك تشوفو، مِن الصَّعب إنّو ما تِتعَرَّف علَيه، لأنّو هوّي نَبع المَعرِفِة يَللي بيِنبَع مِن داخلَك. والله معك.

 المصدر : صوت المحبّة